. اتخذ " ابو الرايق" قرارا استثنائيا بوقف الحرب الزوجية مع" ام الرايق " وذلك بمناسبة مباريات كاس العالم لكرة القدم.
فبدا الرجل رقيقا وملتزمت ولا يقول ( لا) لزوجته مهما قالت أو طلبت. :
* ابو الرايق روح جيب بطيخة واوعك تكون قرعة زي راسك.
_ حاضر.
* روح جيب خبز وفول وفلافل خلي الاولاد يفطروا.
_ حاضر.
* اليوم اختي رح تيجي عندنا هي وأولادها.
اوعك تدير بوزك أو تصير ترمي كلام هيك والا هيك
انا عارفة لسانك لمّا يفلت.
_ حاضر.. سمعا وطاعة. مش رح افتح تمي.

* جارتنا ام العبد رح تمر عندي وتساعدني بتنظيف البيت.. ورح نشطف الدرَج.
عندك اعتراض؟
_ ابدا ابدا
خذي راحتك.

*.....
_حاضر يا مدام على عيني وراسي.
" ام الرايق" تمنت لو كأس العالم كل يوم. الرجل صار " عاقل" ورايق واسم على مسمّى.
كل موعد مباراة، ينبطح قدام شاشة التلفزيون مثل " بعير" / البعير هو الجمل. مرتديا " تي شيرت البرازيل" فريقه المفضل من ايام لاعبه المفضل " بيليه".
كل ما طلبه من ام الرايق " طنجرة بوشار " قبل كل مبارة مع إبريق شاي بالنعنع.
كانت أم الرايق تتأمل زوجها من تحت لتحت وبمكر الزوجات تبحث عن مشكلة لإثارة أعصاب زوجها.
قالت له : ما احلاك وانت لابس تي شيرت زي اولاد " عبدون " والله مش لايقلك اللون الأصفر.
لم يرد ابو الرايق وابتلع ريقه وبقي صامتا
" فلا صوت يعلو على كرة القدم ".
وإذا كان الزعيم جمال عبد الناصر كان يردد " لا صوت يعلو على صوت المعركة".. فان ابو الرايق يردد لا صوت يعلو على صافرة الحكَم. وما حدا احسن من حدا
عبد الناصر اسمه " ابو خالد"
وانا اسمي ابو الرايق..!!