بحياة كل شخص في سنة بتمر عليه بيكبر فيها عشرين سنة بس بهاي السنة تحديداً ما في حدا ما كبر..
ما حدا بينكر أنها كانت سنة متعبة بكل تفاصيلها على الجميع... كانت سنة كلها تعب ومشاكل وقطع ارزاق وجرائم ووباء ومتعبة نفسياً ومادياً ومعنوياً..
سنة علّمتنا انه الموت ما بيعرف عُمر، علّمتنا انه ما في اشي أهم من الصحة، علّمتنا انه اليوم اللي رح يمر ما رح يرجع متله، علّمتنا إنه كل يوم في شيء جديد لنعرفه ونتعلمه، علّمتنا إنه العيلة هي الإرث الأغلى، وإنه أغلب الظواهر الإجتماعية مجاملات يمكن الإستغناء عنها، علّمتنا إنه مش كل حدا حكالك بحبك يعني بحبك لشخصك وذاتك... علّمتنا انه المصالح أهم شيء لوجودك بحياة حدا، علّمتنا إنه الحزن مش أي حدا بشاركك فيه، وعلّمتنا إنه النوايا ما بتظهر الا لما يصير موقف زعل بينك وبين حدا... علمتنا إنه ليس كل قريب قريب، علّمتنا إنه السعادة ليس بطلعاتك وجياتك وإنك بتقدر تصنع سعادتك لحالك،.. علّمتنا إنه الأصحاب ليس بالكترة، وإنه صاحب واحد كويس أحسن من عشرة مجرد إسم وبس.. علّمتنا إننا فترات في حياة بعض.. علّمتنا انه الشهادة ليس كل شيء وإنه عقلك وتفكيرك أهم شيء بهيك زمن.. علّمتنا إنه سعادتك وفرحك ليس بعرس فخم ومظاهر، علّمتنا إنه مش كل الناس خير وبركة ؛ بس بنفس الوقت الدنيا لسا بخير وفيها ناس منيحة.. علّمتنا إنه السلامة في البعد، وأن من أغلق فمه حفِظَ نفسه، وإنه الساكت عن الحق هو الشاطر لإستمرار علاقاته.. علّمتنا إنه الناس بتحسدك على أقل شىء بتملكه وحتى على صحتك.
سنة علّمتنا إنه الأطباع بتتبدل والأُمنيات بتتغير وإنه الدعاء عوض متاح وباب مفتوح دايماً.

والدرس اللي اعطتنا إياه هاي السنة لازم نفهمه منيح ولازم نبدأ السنة هاي بمحيط نظيف وقلب صافي وناس طيبة بيستاهلو يضلوا معك السنين كلها.

اللّهم ارزُقنا الأمل والطموح وحُسن العمل والخير والبركة في الأهل والصحة.